Glügg hadde mer alle mitenanner, däss uns die Corona-Krise nedd scho in die 70er/80er-Johr derwüscht hodd: nur drei Fernsehprogramme, kee Lieferservice, kee Indernedd. Woss hädde mer do bloß gemocht? Doss, woss mer in derre Zeit vuur 40 – 50 Johr in unner Dürfer halt ömmer gemocht hömm: Mussig ooder Fußball gespielt, gschosse (Schützeverein) odder Feuerwehr. Gut, in die Feuerwehr woor so gut wie jeder, bei Mussig, Fußball unn Schütze hodd sichs dann scho a weng unterschiede. Nur – alles woss ich jetzt wehmütig aufgezählt hobb, iss jo in Zeiten vo Corona nedd erlaubt. Owwer scho intressant, wie jeder browiert, mit alle mööchliche Zugständnisse unn Vuurichtsmaßnahme doch widder aktiv sei zu döffe. Unn spannend: vill künnt widder so zurück, wie’s früher woor! Die Fußballer döffe, wenn se trainiern, sich nedd ins Sportheim ömmzieh unn aach ned dusch. Hadde mer alles scho ghood! Früher a Dusche in a Sportheim? Doo hädde mer erscht amol die Wasserleitung unn a Sportheim müss bau. S Sportheim wor früher a Holzhüdde, wo’s Obsträäwaachele dinn gstanne wor unn woo’s gezooche hodd wie Hechtsuppe! Also senn die Spieler vo dehemm aus in ihr Trikot zunn Sportplatz gelaffe, hömm gspielt unn worrn dann oowerts bis neu/zeh Uhr mit ihr durchgschwetzts Trikot in die Wirrdschoffd ghoggt. Wenns ganz dreckig woor, hodd mer in den Gaang vuur die Wirrdschoffd a Brühgelte mit eiskalts Wasser gestellt unn doo hodd sich no jeder n gröbste Dreeg roogewöscht. Unn so gut wie ohne Zuschauer hömm mer meistens aa gspielt. So wie jetzt die Bundesliga. Bei’s Revierderby Dortmund – Schalke worrn 300 Leut ins Stadion. Geisterspiel?! 1978 in die C-Klass bei Grösseneuscht – Rappershause wär doss eine traumhaft grösse Kulisse gewassd! Unn die Musikante? Do geht noch goor nix. Weder bei uns off die Dürffer, noch in der Elbphilharmonie in Hamburg. Mit eens vo die berühmte Blasorchester hodd mer jetzt angeblich tatsächlich Strömungsmessunge gemocht. Mer wollt prüf, wie sich s Virus über die Instrumente verdääl dääd, wenn der Musikant infiziert wär. Zeuch gidds! Die Drommel hömm ganz gut oogschniede, Tuba (Baß), Tenorhörner unn die Klarinette a. Eemo gädds naufwärts, eemo noowärts. Ganz schlecht: Bosaune und Trombedde! Bloose der Leut voll nei die Gsichter. Bloosmussig? Nedd heut unn nedd murrn. Pfeuffedeggel! Schood! Servus, der Eustach.