Jetzt spiel ich amoll Hellseher und sooch euch die Main-Post-Schlagzeile vom 19. Dezember 2025 voraus: „Jagdpächter des Neuschter Punschwaldes kündigt Pachtvertrag“ Unterzeile: „Der Pächter des Jagdreviers Neuschter Punschwald hat die Schnauze voll und wirft seine Flinte ins Korn“. Woss woor bassierd? Des Neuscht anstatt der Alm in die Advents- unn Weihnochtszeit n Punschwald gricht, iss jo bekannt. Off Ooreechung vo n Rhön-Grabfelder Mundartkünstler hadds die Stodt nedd bei n eefoche Punschwald mit Baame, Hackschnitzel unn Buden belässe, sondern a Tierlich eigsetzt. Glenne Rehböcklich zum Beispiel, die Punschtasse oo ihr Geweihlich hänge hatte unn sich die Besucher bedien konnte. Odder Hoose, die blitzschnell neue Bestellunge vo die Kundschoft zu die Standbetreiber gebrocht hömm. A Security woor aa nedd notwendich, weil doss die eigsetzte, männliche Wildsäu, die Keiler, vorbildlich unn konsequent erledigt hömm. Ömm unner Heimat so richtig oozubilde unn widerzuspiegeln, woor aach a richtige Flußlandschaft gschaffe wurrn, in der Forelle gschwömmt senn unn in der sich mehrere leibhaftige Biber so richtig ausgetob unn den Fluß mehrfach aufgstau konnte. A Wolf durft natürlich aa nedd fehl unn jeden Mondich musst der Bauhof neue Hammelich breng unn n Bestand widder auffüll, weil sich der Wolf mit sein Jochdtrieb im Punschwald halt so verhalde hodd, wie er sich nu amol verhäld. Ächhürrnlich hömm frisch gebrönnde Mandel vo die Baame roogschmisse unn so iss alles gelaffe, wie es sich die Stodt gewünscht hadd. Schließlich musst dann owwer doch a Jäger engagiert werd unn der Punschwald iss als Jochdrevier verpacht wurrn. Gute Entscheidung! Der Jäger hodd off die Tierlich, am End owwer aa off die zweebenige Gäst aufgebasst. Ömmer wenn er gemerkt hodd, däss a Gast sei Zech nedd bezohlt hodd, odder a leere Punschtasse nedd zurückgeewe wurrn iss, hodd er mit sei Schrotflinte n Warnschuß obgeewe. S hätt alles nedd schönner sei könn im Neuschter Punschwald, doo koom langsam Verdruss bei‘n Jagdpächter auf. Erscht iss a Treibjochd vo die Stodt nedd genehmigt wurrn unn dann hodd a Eichelhäher persönlich n Bürchermässder n Brief vom Jäger neis Roodhaus gflooche, in dem sich der sein ganze Frust vo die Weidmannsseele gschriewe hodd. Der Jogdbooche Neuschter Punschwald wär a Katastroph, weil jeden Owend, wenn die Dämmerung reibricht unds dunkel würrd, Massen vo Leut in „sein“ Wald dabb dääde unn so a sinnvolle Bejagung vo sei Tierlich unmöglich wär. Er hätt jetzt die Schnauze vool und würrd kündig. Ja, so isses: alle gutgemeende Ideen unn Projekte hömm a Nachteile unn eener stusst halt ömmer … Servus, der Eustach.