So, hömmersch widder gschafft unn die aufreechensde Woche hinner uns gebrochd! Iss scho ömmer a Akt, bis Advent, Weihnochde, die Zeit „zwösche die Johrrn“ mit Silvester/Neujohr unn schließlich Dreikönig römm senn. Unn no alles wie jetzt widder in einigermaßen geordnete Bahnen verläffd. Wobei doss mit die geordnete Bahnen natürlich scho relativ iss. Grood dann, wenn du weniger trink wissd odder goor n „droggene“ Januar oostrebst. Doss iss nedd selten aa der Grund defür, däss grood zwösche Weihnochde unn Dreikönig wahre Männermassen in glennere unn grössere Gruppen vo alle Himmelsrichtunge nauf n Kreuzberg laffe, ömm doo in flüssiger Hinsicht noch amoll so richtig zuzulange. Unn dozu ömmer die saublöde unn neugscheide Empfehlunge unn Frooche in die Zeitung! „Kann ich einem Kater vorbeugen?“, hobb ich neulich gelese. Die Antwurrd: „Ja, das geht. Der Tipp dürfte aber nicht jedem gefallen. Der sicherste Weg, einem Kater zu entgehen, ist einfach, keinen Alkohol zu trinken.“ Doss hädd mir a Dömmerer aa könn gsooch! A annere blöde Frooch: „Wääß jemand, wo "Maßen" lichd?“ „Worömm“ „Mei Hausorzt seechd, wenn ich dürrt Alkohol trink dääd, wär's nedd so schlimm...“ Monichmoll denk ich, däss mer off a saublöde Frooch, eefoch aa saublöd antwurrd sölled. Bestell ich oo Silvester in a Bäckerei drei Salzstange. Verkäuferin: „Zum Mitnehmen?“ Ich: „Nee, ich möcht‘ se gern dooläss unn jede Woche mo besüch …“. Iss doch wohr!!! Zurügg zu die Männergruppen, die in Scharen nauf n Kreuzberg dabbe. Nauf komme se jo alle, owwer die Frooch iss ömmer widder: „Unn wie komme merr widder hemm?“ Früher ganz eefoch. Ich Böschem bei die OVB oogeruft, a freundliche Fraa am Abbarat ghoot unn n Kreuzbergbus nauf s Klössder bestellt. Der hodd dich mit dei Kumpel noo nooch Böschem gfohrn, dann bissde in n Linienbus gstiege, bierselig eigschloffe unn zum Beispiel in Neuscht ZOB widder aufgeweggd. Heut? Anruf bei OVB, widder die freundlich Fraa droo. „Das machen wir leider nicht mehr, das hat jetzt Callheinz übernommen.“ Also gut, Callheinz oogeruffd unn n scho nix merr so freundliche Moo droo ghood. „Haben Sie schon einmal bei uns gebucht?“ „Naa.“ „Wie viele sind sie?“ „Siewe.“ „Zu welcher Uhrzeit?“ „N hallwer vier.“ „Tut mir leid, da sind alle Fahrzeuge schon besetzt.“ Schood! S System scheitert am äächene Erfolg. Wie irchendwenn die Eleggdroaudo. Weils nedd genug Ladesäulen gidd. Dozu bassend: „Woss iss der Unterschied zwösche a Elektroauto unn Durchfall? Doo gidds keen. Bei alle zwee iss die Frooch, ob du‘s noch bis hemm schaffst …“ Servus, der Eustach.