Heut widder mo zum Dhema Zeitungsmeldunge, üwer die mer sich bloß noch gewunner konn. Monichmoll sehn ich mich nooch die gut alt Zeit zurügg. Domools, wie die Noochrichde noch aus langweiligs Zeuch wie n Wetterbericht oder der Eröffnung vo n neue Kreisverkehr bestanne hömm. Heut muss mer beis Aufschlooche vo die Zeitung prüf, ob mer nedd versehentlich in a Satire-Magazin geland iss odder der 1. April vuurverleecht wurrn iss. Drei Meldunge vo die vergangene Woche: In Amerika (wo süssd???) steige die Aktien vo Fluggsellschoffde jetzt scho, weil die Leut dürrt ömmer häufiger zur Abnehmspritze greuffe, dodurch leichter werrn, unn die Äärlines domit mittelfristig Flugbenzin sporrn. Veröggd, odder? Odder bei uns in Deutschland. Der CDU-Wirtschaftsrood, a parteinoher Unternehmer-Verein, hodd jetzt a Debatte über die Privatisierung vo Zahnarztkossde oogstösse. Zahnarztbehandlunge sölle demnooch nix mehr vo die Krankekass, sondern vo die Patiente sellwer bezohlt weer. Doo sooch ich jetzt scho vuraus: die Geisterbohne offs Münchner Oktoberfest werrn scho in wenige Johr nix mer onnder Personalmangel leide! Doo lässt sich doch keener mer sei Waffel richt! Ob doo nedd die Lufthansa dehinner steggd? Überlegt doch amoll: schlechtere Zähn = weniger Essen = weniger Gewicht = weniger Flugbenzin = weniger Kosten = steigender Aktienkurs. Genialer Schachzug! Unn weil mer scho beim Esse senn, bassend dazu die drett unglaublich Meldung, die ich neulich geleese hobb. ZDF, Traumschiff, Sonndichooweds, 20:15 Uhr. Gugge mir Ältere regelmäßig unn worrde alle sehnsüchtig off die Szene am End midds Käptns-Dinner. Ihr wösst scho: Do, wo die Noochspeis mit die Glitzerlich reigedrooche würrd unn die Mussig dezu spielt. Legendär! Unn woss jetzt rauskomme iss: alles Lug unn Trug!!! S ZDF hodd ehrlich zugeewe: „Die Tortenszene wird in unregelmäßigen Abständen neu gedreht, um sie auf der Höhe der Zeit zu halten. Aus wirtschaftlichen Gründen wird sie aber in veränderter Schnittfolge und aus unterschiedlichen Perspektiven für mehrere Traumschiff-Folgen benutzt.“ Frechheit, odder? Oder gelebter Umweltschutz? Wer alte Kamelle statt frisch Eis mit Sahne serviert, schont Ressourcen unn Gebührenzahler! Vielleicht sölled die Lufthansa doss Modell übernehm: Wenn mer sei Fluggäst künftig nur noch alte Archiv-Aufnohme vo Tomatesaft zeigt, statt echte auszuschenke, spoord doss massiv Gewicht – unn die Aktie steigt fast so schnell wie s Flugzeug nooch n Start! Servus, der Eustach.