Weil heut‘ Faschings-Diesdich iss, well ich die Foosenocht für heuer mit Erinnerunge oo mei Kindheit, Jugendzeit unn Sturm- unn Drangzeit ooschließ. Ich wääs es nedd sicher, gläbb owwer scho, däss junge Leut zum Beispiel mit die Begriffe „Marschwalzer“ unn „Laurentia“ nix oogfang könne. Für uns früher a absoluts Muss! Bei’n Marschwalzer senn im Tanzsool zwee Kreise gebild‘ wurrn, die geecheenanner gelaffe senn. Eener mit die Frauen, unn eener mit die Männer. So lang die Mussig n Morsch gespielt hodd, iss gelaffe wurrn unn sobald die Kapell‘ off Walzer gewechselt iss, döfft (odder musst?!) der Moo mit der Fraa tanz, die in dem Moment genau bei ihm im annere Kreis stand. Eine Riesen-Gaudi! „Laurentia“ ging tüchtig nei die Bee unn hodd ömmer zu Muskelkater gführt. Die Melodie konn ich doo leider nedd wiedergeb‘, owwer die Ältere wösse, vo woffer Lied ich red. Der Text woor „Laurentia, liebe Laurentia mein, wann werden wir wieder beisammen sein? Am Sonntag! Ach wenn es doch endlich schon Sonntag wär‘ und ich bei meiner Laurentia wär‘, Laurentia wär!“ Alle worrn im Kreis aufgstellt, hömm sich eighängelt, unn ömmer wenn s Wurrd „Laurentia“ odder eene vo die Wochedooch gsunge wurrn iss, musst der ganz Haufe tief in die Hocke. Unn gleich widder auf! Nooch die letzt‘ Strophe mit die Textzeil‘ „…… Ach wenn es doch endlich schon Sonntag, Montag, Dienstag, Mittwoch, Donnerstag, Freitag, Samstag, Sonntag wär und ich bei meiner Laurentia wär“, hatt‘ mer sage unn schreibe 62 tiefe Hocken hinner sich! Intressant früher aa die Verkleidunge – unn wie viel Kinner Foosenochd off die Ströss worrn! Gfühlt hömm sich alle Kinner voss Durf getroffe unn es hodd vuur Cowboys unn Indianer (Bube) unn Prinzesinne, Schwarzwaldmädels, Rotkäppchen, Bienen, Feen, Krankeschwester und und und (Mädlich) nur so gewimmelt! Wenn du früher als Buu nedd Cowboy odder Indianer worscht, hossde als Außenseiter gegollde. Ich woor amol a Hex‘, hadd‘ a Blassdigmaske mit zwee Löcher für die Aache droff und ständig hömm mir Cowboy mit ihr Erbespistole in die Aache gschosse. S Johr drauf woor ich dann aa widder Cowboy: Franse oo die Hose, a „Welthölzer“-Schochtel für’s Halstuch, unn a Hut! „Und s Schlimmst woor“, hodd neulich eener gsocht, „wenn mer onnder n Cowboy-Hut a Wollkappe aufsetz musst.“ Voll uncool!!! Servus, der Eustach.