So, hömmersch widder gschafft, unn n schlimmste Dooch im Johr gemeinsam hinner uns gebrochd! Allerheilige? Gott bewahre! Doss meen ich natürlich nedd. Ich reed vo „Halloween“! Meine Fresse (im Kürbis …)! Den unseliche, vo Amerika zu uns rüügschwabbde Brauch gidds jo jetzt scho a boor Johr, owwer iich reech mit jedes Johr widder neu drüü auf! Bevuur ich mich richtig üüwer den „Süßes oder Saures“ – Feierdooch ausläss, muss ich a weng aushol. Ich hobb neulich s Buch „Strengt euch an!“ vo Wolf Lotter gelassd. Er, der Lotter, lässd sich in sei Buch über die Arbeitsmoral in die heutig‘ Zeit aus unn sei Buuch gipfelt in dem vielsagende Satz: „Noch nie haben die Menschen so wenig gearbeitet wie heute und noch nie waren sie dabei so erschöpft.“ Wolf Lotter will domit zum Ausdruck breng, däss die Wochenarbeitszeit Mitte vom 19. Johrhunnert noch 82 Stonn woor, unn dann über die Jahrzehnte über 60, 40, 35 bis off heut‘ zum Teil 32 Stonn gsunke iss. Trotzdem senn die Leut‘, die ner bloß noch 32 Stonn in die Woche schaff müsse, nedd erholter wie früher, sondern ehrer gstresster unn unzufriedener. Erschöpft halt. Worömm? Ständige Erreichbarkeit, Informationsflut, gsellschaftlicher Wandel, Zukunftsangst, Krisen, ständiger geistiger Einsatz. Mer kennt doss jo. Die Ältere nur durch Beobachtung, die Jüngere durch Erleben in der Braxis. Unn trotzdem nimmt mer der jung Generation vill, zu vill, oo! Kee Witz: im Katalog vo Engelbert Strauss gidds jetzt scho Arbeitskleidung im „used look“! Wenn du die nooziechst, denkt jeder wunnersch, woss du alles schaffst, du mechst owwer keen Finger gromm! Unn bassend zu Halloween: Ich hobb in a Werbung gsenn, däss es jetzt scho fertig ausghölte, verzierte Kürbisköpf‘ zu käffe gidd. Doss schlööd doch dem Fooß n Boode aus, odder nedd? Gidds demnächst im Baumarkt für die junge Leut in die Dürflich aa scho fertig oogsaachte Mai-Baame? Odder biet doss bekannt schwedisch Möbelhaus mit vier grösse Buchstoobe ball fertig aufgebaute Regale, Tisch unn Stühl oo? Unn die Köttbullar werrn fertig verpackt zum Aufwärme in die Mikrowelle hemm nei’s Haus gscheggt? Irchendwenn konn bei Amazon unn Konsorten dann a Brönnholz ofenfertig in 25er odder 33er Läng bestellt weer. Gidds scho? Wääs ich, owwer in mei Dheorie brengt der Amazonbote vo April bis Oktober jeden Dooch drei Scheit unn setzt die in die Holzhütte, wo er die annere Bägglich jo sowieso scho obbleechd, aa gleich auf!!! Schönne, moderne, eefoche, owwer a gruselige moderne Zeiten … Servus, der Eustach.