Die vergange Woche woor ich aach amol in Neuscht im Punschwald – und ich muss ehrlich sooch: schöö gemocht! Viel Liebe zum Detail, gute Versorgung mit Esses unn Drinkes unn aa süsst: kee Grund zum Glooche! Ees nur: für Männer unn Frauen, die a Fraa bzw. n Moo süche, unn die in die vergangene Johrn die Alm erfolgreich zur Braut-/Bräutigamschau genützt hömm – schwierig! In die Alm hossd du die schwer Holztür aufgemocht, dich durch den als Windfang dienende Vuurhang gewurschelt unn bist schloochoordich vo alle Leut gsenn wurrn. Unn du sellwer kannst, noochdem du die erscht Scham oogeleechd hast, aa genau beobacht unn registrier, wer alles doo iss unn ob eventuell jemand vom jeweils annere Gschlecht doo iss, mit dem sich vielleicht woss ergeb könnt. Ähnlich beim Marktplatzsommer: Sommer, hell, riesig, unn aa gute Chancen, jemand nööher kennezulerne. Im Punschwald: nedd eefoch. Du gessd nei, bist off so a Oord glenne Morrdblatz in a seltsam grüüns Licht gedauchd, guggst dich brautschaumäßig ömm – unn sissd: nix!!! Die ville Krippe senn so gschickt hinne die ville Bäämlich versteggeld, däss du Müh hossd, zu erkenne, wer doo iss, ohne extrem neugierig zu wirke. Dja, nedd eefoch heutzudooch, als junger Kerl a Fraa zu finne. Ganz früher hömm doss Omma unn Obba odder Mudder unn Vodder erledigt (mer iss landwirtschoftsmäßg „verschmust“ wurrn), später gabs jede Menge Mööchlichkeite beim Tanz, n Fasching, die Kirmes odder die unzählige Bierzelt-Festlich. Erscht neulich woor widder a Eheboor (aus Alschlamm) in die Zeitung, die eiserne Hochzich hatte, unn die sich beim Tanz im altehrwürdige „Schwarzen Adler“ kennegelernt hadde. Heut aus zwee Gründ nix merr mööchlich: erschtens gidds kee Tänz merr, unn zweddens iss der „Schwarze Adler“ jetzt in Floodunge im Museum. Zwöschedurch gabs dann die Discos wie „Astoria“ in KÖN, „Glashaus“, „Pinocchio“, „Musikpark“, „Fun“ odder „Filou“ in NES. Heut? Absolute Fehlanzeige! Viel zu wenig Mööchlichkeite, jemand kenne- unn lieben zu lerne. Kee Discos, kee Wirtschoffde, kee Bierzelte mehr. Nooch die Kirch, oo die Milchsammelstell odder notfalls ins Wartezimmer vo die Raiffeisen- odder Spoorkass hodds amol könn klapp. Alles Vergangenheit! Bleibts vermaledait Internet mit Dating-Bladdfurme, die verzweifelt unn für vill Geld Leut zommbreng welle. Allzu oft klappts scheinboor nedd unn so werrn die „Junggselle“, wie mer se früher genannt hodd, ömmer mehr. Unn widder amoll mei alt Red: die Junggselle - a ganz besonderer Menscheschlooch. Sie vermehrn sich nedd, sterbe owwer trotzdem nie aus … Servus, der Eustach.