Ich woor neulich widder mo beim Tischtennis in Könshofe. Bundesliga. Ächendlich a „Muss“ für jeden Rhöner - unn für jeden Grabfelder sowieso! Los gedds ömmer mit dem Einmarsch vo die Mannschoffde. Die Könshöfer kennt mer als Insider mittlerweil, die Gäst nedd alle. Unn wenn die ömmer mit Brimborium eilaffe unn mer guggt sich die Bursche oo, denkt mer nedd selten: „Doss könnte aa Zuschauer gsei.“ Oft junge, dürre Bürschlich, mo glee, mo groß, deggere, dürrere, mit Brill, ohne Brill – owwer jo absolute Hochleistungssportler! Trotzdem: Wenn du mit een vo derre offn Könshöfer Morrdblatz oo die Broodwürschdbroode ins Gspräch komm däädsd, und am End frääch würrds, woss se beruflich mache. Wenn se nedd grood sooch dääde „Ich schaff bei die Siemens in die Staubsauger.“, sondern „Profi-Tischtennisspieler!“ Du: „Alle, owwer du nedd!!!“ Würrd owwer soo senn! Für die fleißige Sportler scho a Brobleem. Oogsehn vo Tischtennisspieler: Wenn a Gewichtheber, a Superschwergewichts-Boxer odder goor a Sumo-Ringer durch irchend a Fußgängerzone läffd, sooche die Leut garantiert abfällig: „No der döffed owwer aa mo woss mach!“ Der müssed woss mach?! Der mechd tausend mo mehr wie jeder vo uns! Trainiert jeden Dooch horrd, bloochd sich, owwer mer sidds ihn halt leider nedd oo! Sumo-Ringer: Die Leut denge oo Bluthochdruck und zu viel Sahnesooß. Merr biet ihm mitleidig n Sitzplatz oo, aus Angst, sei Kreislauf glabbd gleich zomm. Die Realität: Unter die isolierend Schutzschicht aus Körperfett verbirgt sich mehr Explosivkraft wie in n Bulldogg mit 300 PS! Während die Leut noch drüü lästern, däss er in die Schlange vuur a Broodwurscht-Bude stedd, könnt er den ganze Wooche vermutlich mit ee Haand ömmgschmäiß! Ja, der Sport. Olympia iss jo jetzt aa vorbei. Aa die Paralympics. Die Bilanz für uns Deutsche? Gelinde gsochd: Ernüchternd! Die Niederlande (doo iss der Name Brogramm!) hömm kee Berg. Joo, een scho: Vaalserberg, 322 m hoch. Nur mo zum Vergleich: Kreuzberg, Rhön: 928 m. Unn im Medaillenspiechel bei Olympia? Vuur uns! Kee Berg, owwer besser wir unnere!!! Unn aa irchendwo bezeichnend: Deutschland hodd zwee Drittel vo alle Medaille in Sportoorde gholt, wo mer gfohrn würrd unnn nedd laff muss: Rodeln, Bob, Skeleton. Also Schliide fohr. Horrd, owwer treffend analysiert: Die deutsche Sportler senn ömmer nochert gut, wenn se gfohrn werrn. Owwer wehe dem, sie müsse laff odder sich blooch! Servus, der Eustach.