Jetzt, zwee Woche, nochdem die Bombe geblatzt iss, will ich noch amoll drauf zurückkomm. Ihr wössd scho. Des halt. Mit Wülferschhause. Jetzt gedd mirs goor nedd ömm den Fall an sich. Schlimm genug, nur sölle des annere aufklär unn drüü entscheid. Owwer doo sissd du amoll, wie schnell so a Dürfle in unnern beschauliche Landkreis in die grösste Schlagzeile gekomm konn. Bundesweit. Alle worrn se doo, alle! BILD, RTL, SAT 1, Focus-Online, BR-Fernsehen und und und. Und jeder wollt Stimmen hör. Leut sollte vuur die Kamera unn O-Tön von sich geb. In a grössere Stodt hässd du doo als Reporter vor Ort scho a boor Leut gfonne, owwer doo bei uns? Schwierig. Unn natürlich voll verständlich! Wer well sich scho in so a Situation ins Fernsehen seh unn sich red hör? Woss du du sooch däädsd, wär doch falsch! Unn aa intressant, wie sich die Neugier- unn Empörungskaskade trotz ansteigender Entfernung vom Ort des Geschehens gleich hoch hält unn aufbaut! Wenn du als Hollschter (Nochber-Durf) n Wülferschhäuser getroffe hossd: „Woos issn bei euch los?!“ A Grösseweechemer zum Strohlunger (Nochber-Landkreis): „Woss geddn bei euch vüür sich?!“ Worscht du als Wollbicher in Schweifert: „Woss issn bei euch do oowe los?!“ Unn selbst wenn du als Rhön-Grabfelder in Würzburg worscht, ömmer die Frooch in die gleich Richtung: „Woos macht denn ihr für Zeug?!“ Ja, wer den Schaden hat, … Ihr wössd scho. Woss ich mir in die boor Dooch der grössten Empörung aa gedocht hobb: Wie wichtig es doch doo für a Durf wie Wülferschause iss, a Wirrdschofd zu hömm! Du hoggst dehemm, die erschte Noochrichde üüwer den Skandal komme rei, unn du verspürst sofort s Bedürfnis: „Ich muss nei die Wirrdschoffd, mir müsse red!!!“ Iss doch gloor! In so a Situation iss der bersönlich unn direkt Austausch Gold wert unn sowoss vo wichtig! Die Medien: laut, schnell, zugspitzt. S Wirtshaus: langsam, direkt, ungfiltert. WhatsApp unn doss ganz annersch modern Zeuch iss doo doch viel zu kompliziert unn vor allem viel zu langsam! In die Wirrdschoffd: Red, direkte Geechered. Fönnef Informatione, Argumente, Geechenargumente in ee Minudde! Do hömm WhatsApp unn Konsorten doch nedd aa nur den Hauch einer Chance! Broblem nur in Wülferschhause: S gidd zwoor a Wirrdschoffd (Brückenschänke), owwer der Wirt braucht alle Blätz für die ville Leut, die ess welle – unn nedd die Einheimische, die ihrn unselige Skandal diskutier unn domit innerlich verarbeit welle! Idee zur Abhilfe: Mir führn die Milchsammelstelle widder ei. Mellich würrd doo dann zwoor nix merr obbgeliefert, owwer als innerörtlicher Kommunikationsort wärsch unschlagbar - unn soowoss vo wichtig! Servus, der Eustach.