In unner Sprooch gidds Würrder, doo iss die Definition unstrittig unn s konn kee zwee Meinunge geb. „Sofort“ zum Beispiel. Hässd gemäß Duden „Ohne zeitliche Verzögerung, unverzüglich“. Wenn du zu dein Honnd seechst: „Hasso! Sofort her jetzt!“, dann erworrdst du, däss sich der Hasso unverzüglich in Bewegung setzt unn zu dir künnt. Wenn a Fraa zu ihrn Moo seechst: „Erwin! Sofort die Bierflösche weg!“, iss gloor, däss der gebloocht Moo sei geliebts Bier praktisch im sellwe Moment, wie der Befehl ertönt iss, wegstell muss. Römmgedreht in die Wirrdschoffd. Du bestellts a Bier unn die Bedienung seecht: „Kommt sofort!“ Wenns nedd grood a frisch gezapfts, gepfleechts Pils iss, stedds deutlich schneller wie in siewe Minudde vuur dir. Boliddiger unn Verwaltunge hömm anscheinend a annersch Verständnis vom Wurrd „Sofort“. Die Bundesregierung hodd jetzt weeche die hoche Spritpreise als „Sofortmaßnahme“ die Energiesteuer (früher Mineralölsteuer) für zwee Mooned ömm 17 Cent gsenkt. Wobei: Sie hodd nedd, sie wells. Bei Sofortmaßnahme denkt doch der Normalsterblich: Heut‘ beschlosse, würrd ab üüwertsmurrn der Sprit ömm 17 Cent billiger. Ha ha ha! N 1. März senn die Preise weeche den unselige Iran-Krieg wie eine Rakete noch oowe gschosse, unn wenn mer Glügg hömm, greift die jetzt beschlossene Entlastung scho lächerliche ocht Woche später, ronnd ömm n 1. Mai. Üüwerdrooche off a Wirtschoffd: Du bestellst a Bier, die Bedienung seecht „Kommt sofort“, unn scho zwee Dooch später konnst du widder gekomm unn dei Bier stedd offn Diisch. Ja, es iss a Kreuz. Ich sooch ömmer, wenn sowoss wie die derzeitige Spritpreise bassiert, döff mer nedd jommer, sondern mer muss kreativ sei. Ich zum Beispiel mach jetzt jeden Samsdich, wenn Besurchunge oostänn, Broowefahrten bei drei verschiedene Autohäuser. S erscht Auto vom Vorndran, unn domit zum E-Center nooch Mürscht zum Eikäffe. Dann a Auto vom Laudensack, nooch Unslebe zunn Förster unn Pflänzlich gekääfd. Unn schließlich a Auto vonn Kehm, ömm domit zum Metzger zu fohrn unn Flääsch unn Wurscht zu käffe. Wie ich off die Idee komme bin? Woor doch früher, wenn die Kinner noch glee worrn, scho der Trick: N Samsdichfrüh mit alle vier in drei verschiedene Metzgerei. Üüwerool a boor Gelbwuschtscheiwe gricht unn die Kinnder worrn sood! Wie schnell die Politik unn die Behörden reagier könne, sidd mer jetzt aa in Wülferschhause. N 24. März iss dürrt die Wahlfälschung aufgfloohe unn scho n 5. Juli würrd neu gewählt! Eine affenartige Gschwindigkeit, bei dersch een schwindlich würrd! Servus, der Eustach.